السلام عليكم
كيف حالكم
صرلنا زمان ما فتحنا موضوع نقاشي بالمنتدى 🙄
الله يرحم إيام الطوش هههه
برأيكن ... ما سبب حالة الركود بالمنتدى بشكل عام
و في أمل يرجع متل ما كان و كيف السبيل إلى زلك ؟
أم أنت مع إغلاق المنتدى و ابقائه للأرشيف ؟
يرجى التصويت و المشاركة إن أمكن
و لكم جزيل الشكر

المنتدى متل الحياة بحمص ...

متل ما الحياة ماشية بمعية الله بحمص .. المنتدى نفس الشي

هلأ ركود المنتدى لعدة اسباب منها النفسي ومنها التهجير ومنها اغلاق التسجيل ومنها اسباب تقنية

واب حامد عطول صاحب مشاكل ...

من بداية الثورة صار كتير ناس تدخل وما تشارك
وكلمالها الناس اللي تدخل تقل بسبب تأزم الوضع
شوية المشاكل التقنية اللي هون نقلت نشاط العالم من هون للفيس وانا منهم
ومن جروب لجروب ومن صفحة لصفحة
وحتى هنيك بالفيس حاليا صار نفس الوضع .. الصفحات والمجموعات اللي كانت الناس تشارك فيها ما عاد بقى حدا دخل وشارك متل قبل
الوضع النفسي إجمالا بيهوي
مبارح كتبت عالباب وانا طالع من هون .. بتحديث الحالة الشخصية يعني :
المنتدى صار متل حمص .. كلو تهجر وما بقي غير الذكريات

برأيي المنتدى ما رح يرجع يمشي لبعد الثورة
اذا بدنا نرجع نلم بعضنا هلأ .. في فكرة
بس بدها ناس منيح أحسن ما يكون الحكي عالفاضي وبس

انا مع إبقاء المنتدى على ماهو لإظهار الولاء الحقيقي في العسر و اليسر من أمثال أبو حامد

--

تحديث المنتدى يحتاج لجهود جبارة و ماحدا عنده وقت ولا حدا شايف فائدة بالوقت الحالي لهالشي.

--

كحلول بديلة للشباب يمكن اعتماد برامج ومواقع بديلة :

whatsup

Skype

facebook

line

kakaotalk

linkedin

والقائمة تطول و تطول

مع بقائو .. 🙂

أختي نور الهدى مازا تقصدين ب " غير ذلك " ؟!
ممكن تشاركينا رأيك ؟ 🙄

و الله انا مع بقاء المنتدى ......و أتمنى إن تعود الحياة له متل ماكان اول......

هلق حتى الصفحة عالفيس مافي حدا صاير عم يشارك فيها ..... 🤪

الله يفرج عن أهل حمص

يعني بصراحة أحد أهم أسابب غيابي هالفترة الطويلة هو الوضع النفسي، طبعاً الغربتلية حسب ما اكتشفت بتتعب نفسياتهن أكتر من اللي بالبلد، بينما أهل البلد بيوزعو معنويات على بلد!

و بكل صراحة كمان الواحد لما بيشوف شو عم يصير بالبلد بيستحي يفوت على منتديات و يحكي بشغلات أوقات الها طعمة و معظم الأوقات مانها أكتر من عملية تواصل، يعني أنا قطعت المنتدى و قطعت الفيسبوك من أول الثورة لمجرد إني حسيت بالسخافة قدام اللي عم يصير بالبلد و لقيت إنو الواحد يعني بيحني الرأس قدام اللي عم يقدمه بعض الإخوة، بيصير تحديث الحالة عالفيس أو شو صار معك اليوم أو هالكام عصلوجة المعصلجة معاك بحياتك الانشواصية على قولة أبو حامد ليست أكثر من سفة من سفاسف الحياة لا قيمة لها، و بتصير مشاركتها عملية غير ذات قيمة لما الواحد بيكون بالو مشغول بشي أهم. يعني بصراحة ما عاد حسنت أو لقيت في نفسي القدرة على إني احكي، خص لما لقيت إني مقطوع نسبياً عن العمل.

هلأ بلشان غير شوي هالسياسة، لإنو المعنويات العالية و استمرار الحياة و خصوصاً استمرار الحمصنة في ظل الحرب على حمص هو أحد أهم الأمور اللي ممكن نحافظ عليها، مشان أنفسنا و مشان غيرنا، و حتى هالشي ممكن يساعدنا نلاقي شي عمل نعملة بدل ما نستسلم للكآبة.

سبب آخر لانقطاعي عن المنتدى كان وجود بعض الأعضاء ذوي التوجه الواضح قبل فترة قفل المنتدى، و ما في طريقة الواحد يعرف إزا كان لسا في خطوط مراقبة أو عيون داخل المنتدى أو لأ، و أنا بتصور قفل المنتدى كان بسبب هالعضو المحدد بعد محو عضويته و أحترم الصبر الذي صبره أهل المنتدى على وقاحته و حماقته و أنهم لم يهمشوه مع رأيه المريض و المعادي للإنسانية بل حاوروه و ناقشوه حتى لم يعد لديه إلا الأذى. أنا ما كنت بدي خبص شي تخبوصة على "منتدى" حيث قد لا تنفع بجميع الأحوال. الواحد إزا بدو يخبص لازم يخبص تخبيصة محرزة و في مكان محرز و في وقت محرز. لربما يكون هالشي شعور مشترك مع الأعضاء الأخروون بس أنا حالياً مع إبقائه مقفلاً و الحفاظ عليه كعقدة اجتماعية ضرورية في حياة كل من انعقد عليه من العضاوات الأشاوس.

السلام عليكم
كيفكون .....
الوضع العام الكئيب و الحالة النفسية البغيضة بالإضافة للانشغال بظروف العمل و العائلة .....
ولكن يمكننا أن نعود ....و بإذن الله سنعود
راجعلكن😎

بكل بساطة .....بسبب المصايب الي عم تصير ببلدنا .....

للاسف بهالسنتين كتيييييييييييييييييير شغلات تغيرت جواتنا .....او بالاحرى ماتت جواتنا .....
وضعنا كلياتنا شلون عم نتفرج عالي عم يصير دابحنا .....لا الي جوا طالع بايدو شي ,......ولا الي برا .....ولا حول ولا قوة الا باالله .....

ما بتوقع يرجع المنتدى متل اول .....ممكن بعد شي سنتين تانيات الله اعلم .....
الاخ عبد الله الي ما بنعرف شي عنو و عن اهلو بحسو شبح و عم يحوم بالمنتدى ......و بينحرق قلبي عليون .....
الاخوة و الاخوات الاعضاء الي رحلون كتير شهداء .....و الي عندون لسا معتقلين و عم ينتظروا رجوعون ......و المصابين الي صاروا حوالين كل واحد مننا ......بيوتنا الي راحت ......و الناس الي سافرت و تركت بلادها .....و الصبر الكبير للناس الي بقيانة تحت الضرب و الخوف ......و الشي الي بنتشارك فيه كلياتنا الفرجة ثم الفرجة ثم الفرجة .....هاد لحالو عم يموتنا من جوا ..... لولا ايماننا بالله سبحانه و تعالى .....يمكن كان جنينا من زمان .....و ما بنقول غير الحمد لله رب العالمين

يعدمني اليهود يا سايلنت ......دلقت كيسين ملح و نص كيلو ليمون عجروح الاعضاء 😞 روح الله يجوزك يوم الخميس بعد الي جاي 😛

ههههه
آسف زعيمة
..
طيب إذا كانت الحالة النفسية برأي معظم الأخوة المشاركين هي السبب في تراجع نشاط المنتدى
كيف بتفسروا النشاط الكبير في صفحات الفيس بوك الثورية على اختلاف توجهاتها خلال السنتين الماضيات ؟
أقصد الصفحات الخاصة بحمص ..
كمان الحالة النفسية للمشاركين متلنا و رغم هيك كانت الصفحات التي نشأت بعد بداية الثورة تفتح مواضيع نقاشية تهم المجتمع و تعالج هموم الحياة اليومية و تنقل اخبار الأحداث بحمص بأساليب مختلفة حتى لو مجرد صورة معبرة متل صفحة عدسة شاب حمصي , و منها يرسم الإبتسامة غصب عن الواحد متل الصفحة الصينية
حتى المنتدى عنا بالفترة الأولى من الثورة كان جيد جدا برأيي رغم وجود بعض الشبيحة , و بعض الصفحات كانت تاخد الأخبار من عنا
علما إنو كتير من أعضاء المنتدى لهم نشاط بارز في الثورة على مختلف المستويات الإعلامية و الإغاثية و اللزي منو , و هاد شي طبيعي لأنهم من خيرة شباب و بنات حمص و لله الحمد .
هلأ لا شك إنو الحالة النفسية المتردية إلها دور و خاصة عند المغتربين بس برأيكن ما كان ممكن نتجاوز هالمشكلة و يكون للمنتدى دور بارز بالإعلام الثوري على مستوى سوريا خاصة لما كان التركيز على حمص في أوجه باعتبارها عاصمة الثورة بدلا من الإنغلاق على الذات و تسكير المنتدى لأكتر من سنتين لحد ما وصلنا لحالة الركود الحالية ؟!

أنا برأي ما أزال أوافق عبيدة و سايلنت برأيهم بتجديد المنتدى و تديثه و حتى تغيير في قيادة المنتدى و محاولة إعادة الحياة له قدر المستطاع ولو من خلال إدخال أعضاء جدد إليه , ربط المنتدى و ما بعرف شلون لأني ما بفهم بهالشغلة بالفيس أو تويتر و محاولة نقل الأخبار أول بأول و نحاول نرجع متل أول الثورة بنقل أخبار حمص و المدن السورية التاني بالمنتدى و نعرف أكبر قدر ممكن من الأخبار ,,

على كل حال

الوضع العام من المعلقين هو ترك الوضع على ما هو عليه و هو أشبه بالوضع الحالي للغالي حمص القبول بالأمر الواقع ,,,

نسأل الله الفرج على كل حال سواء تغير المنتدى ولا تحسن و لا استمر على ما هو عليه المهم الأعضاء اللي فيه يكونوا بخير وكل المسلمين في سوريا

بس ملاحظة على أندلسي الهوى على فكرة إدخال أعضاء جدد، بالوقت الحالي أنا ضد الفكرة لإنو الأشخاص هون معروفين بالاسم و البحث في المنتدى قد يكشف الشخصيات الحقيقية لأصحاب العضويات و قد يترتب على ذلك أذية لهم أو لأهلهم مع التنويه بأنه لا أحد يعلم ما الظروف الخاصة لكل عائلة و تعقيداتها، فالأفضل عدم فتح العضويات الجديدة حتى نجاح الثورة إن شاء الله. أما إحياء المنتدى عن طريق الأعضاء الحاليين و ما أكثرهم فيمكن باستخدام خاصية إرسال إيميلات لتذكرتهم أو لدعوتهم إلى العودة أو إزا تم هناك تحديث للمنتدى بأن ندعوهم لتجربته من جديد.

أما عن الحالة النفسية التي نذكرها فهي للأعضاء الموجودين و خصوصا (لربما) بحكم كون معظم الناشطين على المنتدى من أهل الغربة، فهم أكثر من تسوء نفسيته، أما عن نشاط الصفحات الفيسبوكية على مختلف توجهاتها فمن الواضح من صفة (ثورية) أنها صفحات نشأت في ظل الحاجة إلي النشاط و الحراك السياسي و الاجتماعي فالمشاركة هناك مهما صغرت يشعر صاحبها بأنه يلعب بها دوراً في موضوع إنساني كبير، بينما التواصل على هذا المنتدى، و بسبب خصوصيته أولا (يتمحور حول حياة حمص) و بسبب انغلاقه ثانيا (لا أعضاء جدد) فيشعر الإنسان أنه يتكلم مع مجموعة محددة و لا يلعب بذلك دوراً كبيراً على أرض الواقع.

و هذا ما عنيته عندما قلت أن التخبيصة يحب صاحبها أن تكون محرزة، و أن الخجل من واقع المغترب بالمقارنة مع من هم على الأرض يجعله يحس بنقصان القيمة مما يقوله على المنتدى.

و أما ما أراه من وجوب تغيير هذه السياسة الشخصية و التوجه نحو الانفتاح و الأمل و عدم الاستسلام لليأس و الرجوع إلى الحمصنة فهو أسوة بعدد من الصفحات الثورية التي لو لم تكن منفتحة و توجهت نحو الضحك في زمن البكاء لكان العديد من أهلنا قد استسلم للدعاية السياسية للعدو و أنجحه بذلك في عدوانه.

المنتدى شكله يا بالجبهة يا بالمهجر يا لاجئ يا استشهد يا تصاوب يا انشل يا اعتقل ...الله أعلم وين راح أو لوين بده يروح .... بس يلي بعرفه إنه المنتدى رح يرجع بيوم من الأيام

فتح التسجيل بالمنتدى ممكن ألا يكون فتح عام لأي كان من الناس ممكن يكون عن طريق التزكية من أحد أعضاء المنتدى و يبعت رسالة إلى الإدارة و هي بتنشئ حساب للشخص الجديد و هاكوزا
المهم الدم الجديد كويس لإعادة الحياة

المنتدى .. الى المتحف

وبتمنى تضل المشاركات القديمة لأنو هيي روح المنتدى

مع بقاء المنتدى .. اكييد

ع امل ان يتحسن وضعو ..

سؤال غريب ابو حامد الوضع (^%%$) شو متوقع من العالم, خلوه يلي بضل مننا طيب بعد مايسقط هالابن الحرام بيرجع المنتدى بيشتغل

كل الأسباب صحيحة , خصوصي انه المنتدى مسكر عن التسجيل , ومافي حركة ..
+ أنه ممكن تكون موضة المنتديات انتهت , صارت الناس أغلب وقتا ع الفيس بوك وبرامج التواصل ع الموبايل ..

صحيح بطيء وفيه مشاكل تقنية , ونايم ..
بس قيمته المعنوية كبيرة .. وان شاء الله بيرجع لنشاطه ..

على الله --- كل شيء على الله

جاي ايام حلوة بأذن الله على المنتدى وعلى حمص وعلى كل سورية 🙂 بلا فيس بلا نفيس

وفاصل ومع حاضرنا وماضينا في المنتدى نواصل