اه يا حمص — أرشيف منتدى حياة حمص

ابو سامي 2007-08-05 13:13 #1

[b]تحياتي لكم جميعا ..
ارجوا قبولي عضوا جديدا معكم
اه يا حمص
اصدقائي الكهرباء والماء والخبز ...لو كانت هي المشكلة ، منتحملها ومنقول ازمة وعم بتمر
انا كنت في اجازة -وطبعا اجازتي لحمص- لابروح ماليزيا ولا شرم الشيخ ولا باريس...
وكل سنة مستنى انا والاولاد هالشهر لننزل زنقضي شهر زمان ببلدنا
وسنة بعد سنة .. ومن 12 سنة نفس الوضع
ومنرجع بعد الاجازة عم نقول ..
اه يا حمص
بعد هالغربة في واحد ما بيتمنى انو يرجع على بلده
ويربي ولاده على عادات بلده
ويخليهم يعيشوا طفولتهم باحضان جدتهم وجدهم واقربائهم
باحضان حارتهم وولاد حارتهم..يعيشوا الشتي والصيف
يشوفوا التلج... ويقطفوا الياسمين..
بس .. اه يا حمص
امتى بدك تسمحي لولادك انهم يرجعوا.. وتحضنيهم بمحبتك ..
وتبعدي عنهم الخوف من الفقر .. والمرض..والحاجة..
امتى بدك ولادك تخلي ولادك يقولوا (يلعن ابو الغربة)
وتخلي المكاتب اللي بتاجر بفييز السفر تفلس
اه يا حمص
ولاد تحت العشر سنين بيمسحوا كنادر بجنينة الدبابير وبمحلات كتير غيرها
وغيرهم عم ببيع كياس نايلون بسوق الخضرة
وغيرهم طالع من براميل (الزبالة) فرحان بلعبة مكسورة شافها
وغيرهم عم بدق بواب بيقلك ساعدني الله يخلليك يا عموا
ناس بتشكي قلة الشغل
واللي عم يشتغل بيقلك ما عم يكفي حق خبز
وبتنزل بتلاقي ما عندك حل الا انك ترجع للغربة
على الاقل بتبعتلك قرشين لاهلك يمشوا حالهم وما يحتاجوا حدا
ولك اه يا حمص
لاقيللي حل... والله حابب ارجع
وما حابب موت بالغربة

أكاسيا 2007-08-05 14:43 #2

أخ أبو سامي أهلا وسهلا فيك بعالم المغتربين الذين يحملون أشواقهم وحنينهم ، بتجرعون غربة هي أولا وآخرا كربة ويتمسكون كل عام بأوهام يعرفون

جيدا أنها لن تثمر ربيعا ومع ذلك يتمسكون بها ..ولأن الغربة كانت الأختيار الذي لا مفر منه ، من هنا تبدأ تلح علينا ولكن أمل العودة لايزال .... بعيدا .

بقراءتي لكتابتك وتفاعلي النفسي مع كل كلمة فيها وبما أني مغتربة مثلك أحب أن أدعوك لقراءة تداعياتي وتجدها في قسم الجالية الحمصية ...

عندها ستجد أن كل ماتشعر به وترسمه حنينا في المنتدى له صدى جميل ... جرب يوميات مغترب وتابع معنا بقية الأقسام .. هنا لن تشعر انك

بعيد عن حمصنا .

تحية وسلام لك من أختك أكاسيا .

على العاصي شتلت الروح 2007-08-06 01:20 #3

اهلا وسهلا فيك اخي ...متل ماتفضلت الأخت أكسيا ....اعمل ما مانصحتك
والله انتي يا أخت أكاسيا متل البلسم عالجرح بكلامك وكتاباتك ...بعمري ما قرأت كلمة من اللي بتكتبيه الا بتبرد اعصابي وبيصير معي هدوء نفسي
اهلا فيك اخي ..والله يعينا ويعينك عالغربة

sam 2007-08-06 01:34 #4

هلا بالأخ ابو سامي....الجرح كبير جدا و مواضيع المنتدى تشهد على ذالك....بس في ملاحظة صغيرة كتير , كان أفضلك تحط موضوع ترحيبك -بقسم أهلا و سهلا باللي جاي- مشان تلاقي الترحيب على أصوله و تضيف الشاي و القهوة و الميلو و كل أنواع المشروبات - غير الكحولية طبعا 😎 -....

تحياتي الحارة و بتمنى انك تستفيد و تفيد المنتدى

سلام

mo2ayad 2007-08-06 07:48 #5

اهلا وسهلا فيك اخ ابو سامي . لمبة جديدة بهالمنتدى المنور 😄

ومع هيك ماصار شي عميل موضوع جديد وحطو بقسم اهلا وسهلا باللي جاي . وشوف الضيافات والهدايا 😎

ابو سامي 2007-08-06 11:19 #6

اكاسيا انا نسخة عنك بالحب والاصالة
mo2ayad لعيونك
sam اهم شي غير الكحولية
على العاصي بدها صبر والله المستعان

شكرا والله شجعتوني انو فضفض همومي بهالمنتدى واهلا بكم اصدقاء في المنتدى وخارج المنتدى

ابو سامي 2007-08-06 12:04 #7

من بعد اذنكم ساكتب في قسم الجالية الحمصية تشجيعا لاعادته

منير ابو رسول 2007-08-08 10:30 #8

السلام عليكم وانا مغترب متلكم والله يردنا سالمين غانمين ونقدر نقدمشي للبلد والله اشتقتلها وانا كمان عضو جديد رحبوا فينا بطريقكم ههههههههه